За 19 Ноември, Тетово и Тетовци секоја година добиваат подарок од уникатни фотографии.
За тоа се задолжени фотографите од фото клубот „Чкрап“, кои традиционално го избираат овој датум за одржување на годишна изложба.
Овојпат беа изложени 35 фотографии, од вкупно 17 фотографи. Клубот секоја година, промовира фотографии и од нови членови.
-Ние сме една од ретките фото клубови коишто секоја година промовираат нови членови. Многу наши членови живеат во други градови во Македонија, но и во странство, но редовно ни испраќаат фотографии. Годинава имаме дури тројца нови членови, како Екатерина Кузмановска од Тетово, Никола Живковски од Штип и Емрах Арифов од Радовиш – истакна Драги Неделчевски.
Изложбите на „Чкрап“ се секогаш масовно посетени, а според коментарите на присутните, фотографиите секоја године се се поинтересни и повпечатливи. Свои фотографии имаа и веќе долгогодишните членови, па и основачи Драги Неделчевски, Зоран Андонов, Мери Каталиниќ и други.
Изложбата беше отворена во Музејот на тетовскиот крај (поранешно Дом на АРМ).