Емоции, сеќавања, солзи, смеа и громогласни аплаузи. Вака накратко може да се опише вчерашната атмосфера на чествувањето на 19 Ноември, Денот на ослободувањето на Тетово.
Салата на ЦК „Иљо Антески – Смок“ – Тетово беше преполна со Тетовци кои синоќа присуствуваа на градската свеченост по повод 81 година од ослободувањето на Тетово.
Пред присутните се обрати претседателката на Сојузот на борци – Тетово, Лилјана Симоска.
-Активно се вклучува 15-от корпус со две дивизии, егејската бригада како и граѓани борци кои несебично се жртвуваат за слободата на нашиот град – ослободено Тетово, во слободна Македонија. Тетово даде три партизански одреди и два народни хеори, Тодор Ципоски-Мерџан и Ѓоце Стојчески-Амбарче, кои се втемелени во историјата на нашиот град. Затоа ние борците, продолжувачи на нивните дела, вечно ќе се сеќаваме и ќе ги славиме. Да си спомнеме вечерва за една света чета – истакна претседателката на Сојузот на борци Тетово, Лилјана Симоска.
За свеченоста беше организирана богата музичка понуда, а настапија популарната македонска пејачка Лидија Кочоска, НУ Камерен оркестар на Битола, како и членовите на Летечката театарска трупа.
Во центарот на вечерта беше и доделувањето на признанија од страна на Одборот на манифестацијата, за животно дело и придонес во одредена област. Добитници се Панче Васоски – Камџик (актерска игра и филм), Гојко Ефтоски (новинарство), Јован Спасеновски – Џагула (спорт), Музичко училиште „Тодор Скаловски – Тетоец“ (образование), Плус форте радио (медиуми), Матеј Печеновиќ (глума) и Никола Трпески С.А.М. (музика).
